Irakurgaia: Maite Oyartzun – Maistra lehenengo, misiolari gero
Maite Nafarroan jaio zen. Urte askoan irakasle izan zen… egun batean Afrikara joan zen arte. Malira joan zen eta bertako ohiturak, bertako kantuak eta dantzak, bertako jendea,… ezagutu zituen. Baina han ikusi zuen zerbaitek zirrara egin zion: ume asko ezin dira eskolara joan, hurrean ez dagoelako eskolarik; ez dute maisu-maistrarik ezagutu eta munduko pertsona guztiak oso maite dituen gure Jainkoaz ez dute inoiz ezer entzun.

Maite etxera itzuli zen, baina ez zegoen gustura, Afrika eta bertako jendea falta baitzituen. Orduan, zeukan guztia uzteko eta besteei laguntzearren lan egiteko nahia sentitu zuen. Hortaz, urtebete geroago Afrikara itzuli zen, Burundi izeneko herrialdera. Han gazteekin, emakumeekin eta gaixoekin egin du lan, kartzeletan, eskoletan eta bakearen eta adiskidetzearen aldeko tailerretan (bata bestearen arerio diren etniak bakean bizi daitezen). 

Burundiren arazo handietako bat: beste herrialde batzuk beronen aberastasunez aprobetxatzen direla. Ume askok meategietan egiten dute lan, telefono mugikorrak egiteko erabiltzen den minerala (koltana) ateratzeko. Beste askori armak erabiltzen irakatsi diete,…

Lehen aipatutako tailer horietan arazo hauek konpontzen ere saiatzen dira.

Mezua: Mundu hobea eraikitzeko lana norberaren bihotzean hasten da