Ondotxo dakizu ikasgai zailak dituzula orain aurretik: zure zain egoten dira, goizero,   Hizkuntza,  Matematiketako problemak, Ingelesa...  Zure lagunengatik, jolas-orduko futbol-partiduengatik, patioko jolasengatik,… ez balitz, Ikastetxetik aspalditxo joana izango zinateke (tira, pixka bat exajeratzen ari naiz).

Ikastetxean irakasle (maisu eta maistra) on asko dituzu, zure tutorea duzu,…  Gauzak ulertzen laguntzen dizute eta, behar duzunean, adorea ematen. Beti daude hurbil. Baina bada Maistra berezi bat,… baduzu horren berri? Maria da, Jainkoaren Ama bera, beti zuri entzuteko prest dagoena. Ez zara ohartu? Agian ez zara maistra honen garrantziaz jabetu... baina Ama Maria da!

Ez dakit konturatu zaren “agurmaria” otoitzaren azkenerantz “erregutu ezazu gu bekatarion alde orain...” esaten dugula. “Orain” horrek esan nahi du orain ari dela guri laguntzen, oraintxe bertan, familian, ikasgelan, ikasgaiaren azalpenetan, problema zail horretan, gogogabetzen garenean... orain, laguntzaren beharrean egoten garen guztietan.

Zure bizitzako une orotan, pozaldietan eta nahigabe eta estualdietan, Ama Maria zure ondoan egoten da. Beti zure ondoan. Baita zure eguneroko zereginean eta zure ikasketetan ere. Zure ondoan dago, zuri laguntzeko. Eta doan eta maitasun osoz laguntzen dizu. Gogoan izan Jesusen Ama Maria gaurko egunean, eta gogora etortzen zaizun bakoitzean esan: “Ama neurea, gertu izan zaitez”.